Шәкәрім университетінің 90 жылдық мерейтойы аясында көрнекті ғалым, профессор, биология ғылымдарының докторы, академик Михаил Семенович Панин атындағы дәрісхана ашылды. Бұл профессор Паниннің ғылым мен білімнің дамуына, сондай-ақ Қазақстанның экологиялық байлығын сақтауға қосқан үлесіне берілген баға ретінде университет тарихындағы маңызды сәттердің бірі.

Саналы ғұмырын Шәкәрім университетіне арнаған Михаил Семенович Панин ассистенттіктен бастап, оқу орнының басшылығы лауазымына дейін көтерілді.  Оның биогеохимия, экология және химия салаларындағы ғылыми зерттеулері, білім беру бағдарламаларын дамыту мен жоғары білікті кадрлар даярлау ісіндегі үлесі Қазақстан ғылымы мен жоғары білім жүйесінде өшпес із қалдырды.

1300-ден астам ғылыми жарияланымдары, халықаралық конференцияларға қатысуы, ғылыми-әдістемелік еңбектері мен оқулықтары Михаил Паниннің дәуіріміздің көрнекті ғалымдарының бірі екенінің айғағы.

Панин атындағы кабинет оның еңбектері және зерттеу жұмыстарымен жабдықталған ғылыми орталыққа айналады. Мұнда экологиялық білім мен ғылымды дамытуға, қоршаған ортадағы ауыр металдар мен радионуклидтерді зерттеуге арналған дәрістер, семинарлар мен кездесулер өтеді.

Кабинет, сонымен қатар, Михаил Семеновичтің ғылыми және оқытушылық қызметінің айғағы болған өмірбаяндық материалдарын, фотосуреттерін, марапаттары мен дипломдарын сақтайтын орталық болады.