Халықаралық QS Stars рейтингтік жүйесі Shakarim University-ге жоғары баға беріп, 4 жұлдызды иеленуге лайық деп таныды. Бұл бағалау біздің оқу бағдарламаларымыздың сапасы мен тиімділігін, түлектердің жұмысқа орналасу деңгейінің жоғарылығын, сондай-ақ, университет жұмысының әлеуметтік жауапкершілікке, инклюзивтілікке және экологиялық тұрақтылыққа негізделгенін растайды.

Университет «Білім беру», «Жұмыспен қамту», «Басқару», «Әлеуметтік ықпал» және «Күшті бағдарлама» санаттарында 5 жұлдыздық бағаға ие болды.

Университет үшін маңызды жетістіктің бірі – «Химия-биология» білім беру бағдарламасының «Күшті бағдарлама» санатына енуі, сөйтіп, 5 жұлдызды еншілеуі.

Сонымен қатар, «Инфрақұрылым», «Әртүрлілік, теңдік және инклюзивтілік», «Академиялық даму» және «Интернационалдандыру» санаттары бойынша 4 жұлдыз еншісіне тиді.

QS Stars жүйесінің ерекшелігі – әр университеттің мықты жақтарын көрсетеді, оларды басқа университеттермен тікелей салыстырмайды. QS Stars жүйесіне халықаралық стандарттарға сәйкестікті көрсететін 50-ден астам көрсеткіш кіреді. Бұл жетістік – Shakarim University ұжымының әлемдік аренадағы орнын нығайтуға және дамытуға бағытталған жұмысының нәтижесі.

Университет ұжымын біздің Альма-Матердің 90 жылдық мерейтойы қарсаңында осындай жоғары бағаға ие болуымен құттықтаймыз!